“Coidado con Galicia: está inzada de subalternos. Non están organizados, pero bailan e cantan e gruñen e fano en galego (uns) e sen permiso (todos). E enriba, reprodúcense”.
_
Así empeza o dossier que preparei, con axuda de David Saavedra, para a Rockdelux de outubro. Non están todos os que son, xaora. Faltan moitísimos, non só Mequetrefe. É unha panorámica urxente, centrada sobre todo na produción máis recente, e pretendía centrar a cuestión. Faino Daniel Salgado, de Das Kapital, ao comezo: “O problema do epígrafe pop galego procede do problema político de Galicia. Hai dúas linguas, pero unha, o galego, histórica e politicamente sometida. Se non partimos dun consenso, de novo político, sobre esta base, é imposíbel chegar a ningún acordo. Para que haxa libre elección debe haber igualdade de condicións, e é evidente que na Galicia dos últimos cincocentos anos, e sinto poñerme estupendo, non a houbo. E segue sen habela. O pop non pode evitar enfrontarse a estas contradicións e tomar posición. Tampouco diante do conflito de clases. A partir de aí, como dicía Ramón de Valenzuela, é tempo de apandar”.
Entre Daniel Salgado, David Saavedra e o que lle dá á tecla armamos unha nómina bastante xenerosa de proxectos, a maioría deles con produción recente circulando libremente pola rede: Das Kapital, con Ruído Negro; Ataque Escampe, con Violentos anos dez; Vale Tudo, desaparecidos en 2009 pero a piques de dar noticias nalgunha das súas secuelas; Emilio José, que xa tarda en parir a continuación de Chorando apréndese; os pontevedreses Urro; Dios Ke Te Crew, con Humanose; Malandrómeda e Fluzo, destacando este último debut; e Diadermin e Murmel Bruxas, con referencias en SosoAudio. Tamén hai sitio para Triángulo de Amor Bizarro e o seu Año Santo; Nadadora con Luz, oscuridad, luz, ademais dos seus compañeiros no catálogo de Ernie Records; Carrero Bianco con Oferta de lanzamiento; Colectivo Oruga, por Too Many Knobs; Disco Las Palmeras! con Nihil Obstat; SraSrSra e os seus traballos na rede; Mano de Obra e Imperio Cobra; o debut de Franc3s; a carreira de Apenino; e a tropa do Galician Bizarre.
