O ano pasado por estas datas deixaba de imprimirse o Xornal de Galicia. Para entón xa había meses, talvez un ano, que o suplemento cultural era un exquisito cadáver. Por se a alguén lle presta, aí van outros cinco números.
_
Máis para a hemeroteca (alternativa) de Xornal: un número que anticipaba a irrupción do Novo Cinema Galego e dedicaba dúas páxinas a Oliver Laxe moito antes dos capitáns; outro no que Rebeca Baceiredo entrevistaba a profesora Blanca Muñoz; este con Eduardo Blanco Amor na portada no cincuenta aniversario d’A Esmorga; estoutro cunha reportaxe de Arturo Losada sobre o contrabando na raia entre o cómic e a literatura galega; e por último, aquel que abriamos cun bo titular de Rodri Suárez: “Desmontando a Brañas”.
O de arriba é Oliver Laxe.